Iñigo Legorburu hernaniarrak lehen saria irabazi du Mungiako San Antontxu XXIV. bertso paper lehiaketan. Taket bertso eskolak urtero antolatzen duen lehiaketa da, eta 2014az geroztik, Legorburuk hiru aldiz lortu du irabazle izatea. Aurten, sari gisa, Taket oroigarria eta 300 euro jaso ditu.
Lodifobiaren bueltan, Unai Agirreren doinuarekin
Helduen kategorian, hernaniarraren Lodifobiarik ez izan da sorta sariduna. Unai Agirreren Baneza eta banitu doinua aukeratu du, eta aukeraketa «nahiko berezia» izan dela aitortu du. «Bi zati ditu: lehenengo lau lerroek errima dute eta, ondoren, bigarren zatian, zortziko haundi baten antzekoa da».
Gainera, gaiak berak ere zeresana duela azpimarratu du Legorburuk. «Aukeraketa hau egin dut gizartean, begi aurrean egonagatik, sarri ez garelako lodifobiaren presentziaz ohartzen. Eta, neurri batean edo bestean, guztioi zeharkatzen gaituen gaia delako».
Legorburuk asebeteta eta pozik jaso du saria, eta aipatu du orain arte izandako hiru garaipenez gain, bigarren eta hirugarren postuak ere lortu dituela: «2009ko edizioan hasi nintzen parte hartzen, eta ordutik ez dut bakar batean ere hutsik egin». k
1.
Bizitzaren loteriak
sari gisa, komeriak
igortzean, alegriak
non, biztanlego erdiak?
Egi-oste ko gizarte hontan
aldatuz doaz egiak
baina benetan iritzi denak
ote dira zilegiak?
Kilotxo batzuk gora-behera
gu bihurtzean eriak
zenbat ertz izan ditzaken
egun gorputz borobilegiak! (BIS)
7.
Batez ere emaztea
bazara, a ze kaltea!
Inon ez zara maitea
ta baietz itxi atea!
Lodifobiak antigorputzak
sortzea du aldartea
lotsak musuko gisa dihardu
zail da ezer esatea …
Pandemiaren metafora hau
al da gure izatea?
Guri neurriak betearaziz
gaixotzen du gizartea. (BIS)