Urtea ezin hobe hasteko, Aduna inguruko parajeetara irteera antolatu dute Mendiriz Mendiko kideek. Adunatik hasi eta bertan amaituko dute ibilbidea, Atxulondoko burdinolatik eta Belkoain gailurretik igarota. Guztira, 14 kilometroko bidea egingo dute, 600 metroko desnibelarekin. Horretarako, 4 edo 5 ordu beharko dituztela aurreratu dute.
Goizeko 08:00etan abiatuko dira Atsegindegitik, eta bazkal ordurako Hernanin egongo direla adierazi dute: «irteera goizekoa da, eta eguerdirako bueltan izango gara».
Izena emateko epea joan den herenegun amaitu zen, baina laster jakinaraziko dituzte datozen irteeretarako egunak. Interesa dutenek, elkarteko bulegotik (Iturregi plaza) pasatzea besterik ez dute, astelehenetan, ostegunetan edo ostiraletan, arratsaldeko 20:00etatik 21:00etara bitartean.