Gabonetako etenaldiaren ondoren, asteburu honetan bueltatuko dira lehiara, Hernaniko boleibol taldeak. Eta Euskal Ligan, etxetik kanpo jokatuko dute biek.
Nesken taldeak gaur dauka hitzordua, Sestaon. Arratsaldeko 16:00etan hasita, Sestaoren kontra jokatuko dute, Benedicta kiroldegian. Oso partidu zaila daukate hernaniarrek, ligako liderra baita talde bizkaitarra, jokatutako zazpi partiduak irabazita, nagusitasunez. Hernaniarrek bost partidu bakarrik jokatu dituzte orain arte, eta garaipen bakarra daukate.
Mutilek, berriz, Gasteizen jokatuko dute bihar, Udapa Jatorkideren talde jubenilaren kontra. Eguerdiko 12:00etan daukate hitzordua, Aranalde kiroldegian. Irabazi beharrekoa daukate hernaniarrek, goiko postuen lehian sartzeko berriro.