Dagoeneko lau urte dira, erretiratuak eta pentsiodunak kaleetan barrena manifestatzen eta eskubideen alde aldarrikatzen hasi zirenetik. Hori horrela, astelehenean, udaletxeko arkupeetan bildu ziren, hainbat gai lantzeko. Alde batetik: lau urteko ibilbidearen balantzea, eta orain arte aldarrikatutako eskubide urraketa. Eta bestetik, banku-establezimenduei zuzendutako eskaera: «Hernanin leihatilako aurrez aurreko eragiketak egitea erabakitzen duten bezeroei errespetatzea».
Hortaz gain, azaldu dute 2022rako soldaten igoera %5,6ko KPIarekin kalkulatu dutela, «baina tranpa dauka. Izan ere, kopuru horretatik, %2,5a bakarrik jasotzen dugu, eta % 3,1a kentzen zaigu, atzerapenengatik». Halaber, duela gutxi ontzat emandako erreforma baten aurka egin dute herriko pentsiodunek, honakoa adieraziz: «erreforma honek erretiratze adina atzeratu du, 67 urtera igota. Honek, hasierako pentsioa kalkulatzeko urte kopurua zehazten du, % 100erako kotizatutako urte gehiago eskatzen ditu eta lan-bizitza luzatzea saritzen duen erreforma da, gazteen % 40ak lan egiten ez duen bitartean».
Beste hainbat kexa eta eskaera tarteko, hauek guztiak aldarrikatzeko, hitzordua jarri dute bihar eguerdiko 12:00etan, Donostiako Alderdi Ederren: «Lau urte eta gero borrokak darrai» lelopean, herritarrak gonbidatu nahi izan dituzte: «datozen belaunaldien etorkizuna ere jokoan baitago, beraz animatu! eta zatoz pentsiodunekin mobilizatzera».