Atzeratutako partiduak eta lagunartekoak jokatzeko aprobetxatu dute asteburua, Hernaniko eskubaloi taldeek; eta bost partidu jokatu dituzte guztira. Horietatik hiru izan dira lehiaketakoak, kadete mailakoak.
Neska kadeteek lortu zuten garaipena, Munttarperen kontra, larunbat arratsaldean. Ligako bigarren sailkatua zuten aurrean, eta garaipen haundia lortu zuten hernaniarrek, kiroldegian (26-18).
Mutil kadeteek, aldiz, bi partidu jokatu zituzten asteburuan, biak ere etxean; baina ezin izan zuten garaipenik lortu: 29-32 galdu zuten Urnietaren kontra, larunbatean; eta 28-39 Zarautzen kontra, igandean.
Lagunarteko partiduetan, berriz, mutil jubenilek 44-35 galdu zuten Usurbilen; eta mutil infantilek 21-27 irabazi Leizaranen kontra, Andoainen.