Osasuna, askatasuna eta egia: pasaporterik ez! lelopean, manifestazioa antolatu dute gaur arratsalderako, Hernanin. Plazatik abiatuko dira 19:30etan, «txertatuak eta ez txertatuak elkarrekin, Bizitza Plataformak dioen bezala»; eta Tilosetan bukatuko dute, adierazpena irakurriz.
«Ia bi urte hauetan, hondoratze soziosanitario eta soziolaboralarekin, eguneroko informazio zurrunbiloarekin ere, ikusi dugu zalantzak eta ziurgabetasunak uxatu beharrean, areagotu egin direla. Izan ere, osasungintzako langileek eman duten informazioak, ospitaletako errealitatearen inguruan, gero eta gehiago egiten du talka egunero prentsan eta telebistan ematen digutenarekin», azaldu dute.
Horregatik, Ginko batzarra izenekoa sortu dute, «harrera egin eta laguntza emateko, bestelako informazioa behar duten hernaniarrei, prentsatik eta telebistatik harago. Leiho ireki bat, nahi dutenei aukera emango diena begiratzeko, beste ikuspegi bat deskubritzeko, beste errealitate bat, itxaropentsua».