Euskal Herri mailako mobilizazioa deitu zuen Sarek gaurko, urtero bezala; baina egungo osasun egoeragatik, manifestazio bateratuaren ordez, herriz herri egitea erabaki dute. «220 herri baino gehiagotan» izango da manifestazioa gaur, arratsaldeko 17:00etan hasita; eta Hernanin ere jarri dute hitzordua: Plazatik abiatuko dira.
Hernaniko Sarek deia luzatu die herritar guztiei, mobilizazioan parte hartzeko, «Bilboko kaleetan milaka eta milaka lagunek plazaratu nahi genuen aldarrikapena» zabaltzeko herriz herri, Elkarbizitzarako, bakerako, etxerako bidean lelopean.
«Inoiz baino beharrezkoagoa ikusten dugu aldarrikapena bizirik mantentzea, eta Euskal Herriko kaleak betetzea, bidea egiten jarraitzeko; bizikidetzarako bidea, bakerako bidea, etxerako bidea», adierazi dute.