Bi asteko atsedenaldia izan du Hernanik, Ohorezko B Mailan, urteko azkeneko partiduan jasotako kolpeari buelta emateko. Pasek Belenos liderraren kontra galdu zuen Anoetako miniestadioan; eta horrekin batera, igoeraren lehian jarraitzeko aukera gehienek ere egin zioten ihes talde trikoloreari. Aurreneko hiruen artean sailkatu behar du aurreneko fasearen bukaeran, lehia horretan jarraitzeko; eta une honetan, sei puntu gehiagorekin dago Getxo, hirugarrena.
Bizkaitarrek partidu zailenak dagoeneko jokatu dituztela kontutan hartuta, oso zaila dauka Hernanik, Getxo harrapatzea. Baina ez dute saiakera horretan etsiko, eta bizkaitarrek huts egin eta aukera txikiena suertatuz gero, baliatu egin nahi dute. Horregatik, garaipena lortu behar dute trikoloreek, geratzen zaizkien hiru partiduetan; eta hiruetan erasoko bonusa ere eskuratu.
Bihar izango dute aurrenekoa, Gasteizen: Gaztediren kontra jokatuko dute, 11:30etan hasita, Gamarra zelaian. Ligako bederatzigarren sailkatua da talde arabarra, zazpi partidutik bi irabazita; eta, beraz, irabazi beharrekoa daukate trikoloreek.
Jardunaldi honetan bertan dauka Getxok geratzen zaizkion partiduetan zailena: Ourenseren kontra jokatuko du, etxean. Bosgarren dago talde galiziarra, eta litekeena da bizkaitarrei lana ematea. Gainerako bi partiduetan, multzoko azkeneko bi sailkatuen kontra ariko da Getxo; Uribealdearen eta Palenciaren kontra, hain justu.
Hernanik, berriz, Uni Bilbao hartuko du datorren asteburuan, eta Zarautzen zelaian jokatuko du azkenekoa, bi aste barru.
Egoera zailean daude trikoloreak, baina bukaerara arte daukate bere onena eman beharra, Getxok huts eginez gero, igoerara fasera aurrera egiteko aukerei eusteko.