Berezia izaten da Urte Berri eguna, Hernaniko Txistulari Bandako kideentzat. Goizean goiz kalera atera, eta Kaxkoan barrena ibiltzen dira, Joxe Ansorenak sortutako Urte Berri goiza doinua jotzen. Berezia izaten da kale buelta horren bukaera ere, Plazatik pasa Leokadistira joaten baitira, doinu horren airera.
Baina are bereziagoa izango da aurtengo diana, bertan joko baitute azkenekoz Txistulari Bandarekin, bi kide historikok: Patxi Apezetxeak eta Joseba San Sebastianek. Biek ala biek hasi zuten beraien ibilbidea Urte Berri egunez, eta bukatu ere, halaxe egingo dute, data borobilean. 56 urte egin ditu Apezetxeak Txistulari Bandan, eta 51 urte San Sebastianek.