Parekatua bezain ikusgarria espero da Binakako Txapelketaren finala, gaur gaueko 21:15etan hasita, Galarretan. Bi bikote sendo izango dira protagonista: Javier Urriza eta Jagoba Labaka, iazko txapeldunak, gorriz; eta Imanol Ansa eta Ibai Martirena, txapelketa honetan sasoi onena erakutsi dutenak, urdinez.
«Primeran» elkar ulertzen dutela onartu dute Ansak eta Martirenak, eta «gozatzen» ari direla txapelketan. Ilusio haundiz eta «ondo prestatuta» iritsiko dira finalera, baina partidu gogorra espero dute, eta «kontrarioa mugitu» beharko dutela uste dute. Martirena izango da debutari bakarra, gaurko finalean: «jokatzen hasi arte urduri egongo naiz, baina hortik aurrera ahalik eta ondoen aritu beharko dut. Txapela posible ikusten dugu, baina oraindik asko dago egiteko. Txikitatik aritu naiz Imanolekin erremontean, eta oso polita izango litzateke berarekin irabaztea».
Ligaxkan, 40-31 nagusitu ziren Ansa eta Martirena, baina ordutik gora egin dute Urrizak eta Labakak: «erraz irabazi ziguten, baina gure sentsazioak oso onak dira orain, eta konfiantza gehiagorekin gaude». Badakite Urriza saihesten saiatuko direla kontrarioak, eta Labakari lana ematen: «beraiek iniziatiba ez izaten saiatu behar dugu, eta bikote sendoa garela erakutsi».
Jaialdiko bigarren partidua izango da finala, eta ETB1ek zuzenean emango du, 22:30etatik aurrera. Horren aurretik, hirugarren posturako lehian ariko da Endika Barrenetxea hernaniarra, Ander Goikoetxearekin batera, Aritz Juanenearen eta Joxin Aizpururen kontra.