Bailarako sortzaileen proiektuei ahotsa emateko asmotan, Sortzaileon Azoka antolatu zuen Dobera-Kronika lantaldeak larunbat honetan. Egun berezia izan zen, Atsegindegi postuz bete baitzen goizetik hasita eguerdira arte. Bailarako sortzaileek beraien produktuak aurkeztu zizkieten herritarrei, eta Gabonetako erosketak egiteko aukera ere izan zen.
Guztira, 23 postu jarri ziren, eta denetarik eskuratu ahal izan zuten bertaratu zirenek. Eskuz egindako telazko poltsak, zapiak, belarritakoak, koadernoak, panpinak, ilustrazioak... eta plazera izan zen guztiak ezagutzea.
Larunbatean izandako harreragatik, Dobera-Kronikako lantaldeak eskerrak ematen dizkie parte-hartzaileei eta baita bertaratu ziren guztiei ere. Martxa hau hartuta, datorren urtean ere gogotsu izango gaituzue proiektu berriak ezagutzeko eta azoka berriro ere antolatzeko!