2021eko Bizkaiko Bertsolari Txapelketa jokatu zen larunbat arratsaldean, Miribillan. Jendez lepo zegoen aretoa, ia 4.000 lagun elkartu baitziren zortzi bertsolarien lana entzutera. Final bizia izan zen, eta, azkenean, Hernanin bizi den Nerea Ibarzabal Saralegik jantzi zuen txapela.
Egun bat lehenago Kronikari aipatu zion udazkeneko bertso-txapelketan «emakumeen ahotsa entzun» dela eta nabaritu dela emakumeak «bertan daudela». Bada, horixe bera baieztatzera igo zen Ibarzabal Bilbao Arenako oholtza gainera. Hasiera-hasieratik, publikoa poltsikoratu eta sorgindu zuen Ibarzabalek. Harry Potterretik hartutako doinu bat aukeratu zuen hasierako agurra egiteko, eta berehala piztu zuen entzuleen arreta.
Ondorengo ariketetan ere bikain aritu zen Markinakoa, eta txapelketan erabat murgilduta, saioak aurrera egin ahala, argi nabarmendu zen. Jone Uria Albizurirekin jokatu zuen buruz burukoa, eta finalaren azken txanpan, publikoa adi-adi mantentzea lortu zuten biek. Zortziko txikian eta seiko motzean aritu ziren, eta epaimahaiaren erabakiz, Nerea Ibarzabal izan zen Bizkaiko 2021eko Bertsolari Txapelketako irabazlea.
Moises Enbeitak eta Joseba Etxebarriak jantzi zioten txapela, eta malko artean, indartsu altxa zuen makila, publikoari begira. Jone Uriak lagunaren lana txalotu zuen, bera ere malko artean zegoela. Eta gainerako bertsolariek ere emozio haundiz txalotu eta entzun zuten txapeldunaren agurra: «Gure etxeko andre guztiak nahi nituzke ohoratu / egoerarik gogorrenetan ez direnak hondoratu / bizikideei, bertsokideei bihotzetik bost olatu / badago nondik jasoa eta badago zer geroratu / muga, kartzela, harresi, ibai galerak zelan kontatu / merkantzientzat bideak libre, ta pertsonak zokoratu / baina itzarrik eusten gaituzten, ideia hoiei oratu / hormak higatu daitezkeelako ta arrakalak loratu». Bertaratutakoek txalo zaparrada artean agurtu zuten Ibarzabal, eta txapeldunak, trukean, muxua bota zien airera entzule guztiei.
Lau bat orduz aritu ziren bertsotan zortzi bertsolariak, eta honako hauxe izan zen bakoitzak lortutako puntuazioa: 874,5 punturekin, Nerea Ibarzabal Salegi; Jone Uria Albizuri (866); Etxahun Lekue Etxebarria (520,5); Xabat Galletebeitia Abaroa (507,5): Onintza Enbeita Maguregi (489,5); Aitor Bizkarra Ruiz (486); Aitor Etxebarriazagarraga Gabiola (484); eta, zortzigarren postuan, Gorka Pagonabarraga Agorria (464).
Bailarako herritarren babesa
Bizkaian ez ezik, Urumea bailaran ere gertu-gertutik jarraitu zen finala, kuttuna baita Ibarzabal Hernanin. Twitterrean mezu mordoa jaso ditu Markinakoak, eta horietako bat izan da Kattalin Minerrena. Honako hauxe idatzi zuen hernaniarrak bere kontuan: N E R E A I B A R Z A B A L.
Horrekin batera, euskal kulturgintzan aski ezagunak diren beste hainbatek ere zoriondu zuten Ibarzabal sare sozialen bidez. Eneko Sagardoyk, esaterako, hauxe txiokatu zuen Nereak hasierako agurrean egindako magiari keinua eginez: zelako poza eta hunkidura atzo hau bertatik bertara bizitzean. Zorionak, @ibarnere! Hain merezita! Eta zorionak beste zazpiei! Denak ere pixkat Hogwartsekoak zarete.