Azken asteotako euriteek herriko hainbat txoko ur azpian utzi zituzten. Horietako bat izan zen Floridako tunela, urak berehala egin baitzuen gainezka eta, ondorioz, pasabidea erabat itxita gelditu zen oinezkoentzat eta autoentzat. Horren harira, EAJ-PNVk salatu du egoerari konponbidea eman behar zaiola, eta, horrekin batera, ziurtatu du alderdi jeltzaleak egindako proposamenak arazoa konponduko lukeela.
Proposamena aztertzeko eskaera egin du EAJ-PNVk
«Euri asko egiten duen guztietan betetzen da urez Floridako tunela», adierazi dute. «Ez du ura biltzeko sistema egokia, eta horregatik gelditzen da ur azpian». Horrekin batera, Andoni Amonarraiz EAJ-PNVren bozeramaileak hauxe zehaztu du: «gure proposamena aurrera eramango balitz, uholde horiek ez lirateke gertatuko. Euri-uraren kanalizazioak egokiak izango lirateke eta, gainera, laguntza-ponpak jartzeak arazoak konponduko luke».
Amaitzeko, aipatutako guztiagatik, Amonarraizek kexa adierazi du eta egoerari konponbidea emateko eskatu du: «ez dakigu Floridatik trafikoa eta pertsonak irteteko dugun proposamena aztertzeko eragozpena zein den. Zergatik ez da egiten? Guk galdezka jarraituko dugu, eta bitartean, ur guztia iragazi arte, ezin izango da tunela erabili».