Maila haundiko partidua izango da gaur, eguerdiko 11:45etan hasita, Hernaniko kiroldegian: Euskal Ligakoa jokatuko du mutil nagusien taldeak, Udapa Jatorkideren kontra.
Sailkapeneko goiko postuetan daude bi taldeak, elkarren segidan: hirugarren dago Jatorkide, 13 punturekin; eta laugarren dago Hernani, 9 punturekin, partidu bat gutxiago jokatuta. Hortaz, aukera ederra daukate hernaniarrek, hirugarren postu horretara gerturatzeko.
Horretarako, atzean utzi beharko dute aurreko asteburuko porrota gogorra. Bi asteko etenaldiak kalte egin zien, eta 3-0 galdu zuten hernaniarrek Sestaon. Behin lehiara bueltatuta, bere maila onena berreskuratu nahi dute, gaurko partidu garrantzitsua irabazteko.
Euskal Ligako nesken partidua, atzeratuta
Etxean jokatu behar zuten asteburu honetako partidua, Euskal Ligako neskek ere. Baina Covid ziurtagiriarekin gorabeherak direla eta, partidua atzeratzea eskatu du Lekeitio kontrarioak; eta onartu egin du Hernanik.
Bi asteko etenaldia izan zuen nesken taldeak ere, eta aurreko asteburuan jokatu ondoren, etena izango dute berriro.