Ia hil ala biziko partidua dauka Hernanik gaur, Ohorezko B Mailako aurreneko fasean, igoeraren lehian jarraitzeko. Pasek Belenos liderra izango du aurrean, eta garaipena behar du talde trikoloreak. Eta partidu erabakigarria ezingo dute Landaren jokatu, uholdeen eragina nabarmena baita oraindik ere. Anoetako miniestadioan ariko dira hernaniarrak, gaur arratsaldeko 16:00etatik aurrera.
Landaretik kanpo bada ere, irabazi beharra daukate trikoloreek. Izan ere, porrotak asko zailduko lieke hurrengo fasera sailkatzea. Jokatzeko lau partidu falta direnean, laugarren dago Hernani (25 punturekin), eta aurreko hiruetako batek huts egitea behar du: Pasek Belenosek (34 puntu), Independientek (33 puntu) edo Getxok (30 puntu). Bide horretan, alde izango du gaur jokatuko den beste partidu bat: elkarren kontra ariko dira Getxo eta Independiente, arratsaldeko 17:00etan Faduran.
Hernanik gaur irabaziz gero, gertuago izango luke Pasek Belenos, eta baliteke Getxoren pare jartzea ere, bizkaitarrek Independienteren kontra galduko balute. Gaurkoaren ondoren, lau talde horien arteko partidu bakarra izango da: Independientek eta Pasek Belenosek Santanderren jokatuko dutena, hurrengo jardunaldian, urtarrilaren 9an.
Baina kontu horiek guztiek balioa izan dezaten, gaurkoa irabazi beharra daukate trikoloreek, Anoetako miniestadioan; eta horretarako, Landareko zaleen laguntza beharko dute Donostian, taldeari ahalik eta bultzada haundiena emateko.
Partidua zuzenean ere eskainiko du Hernani Rugby Elkarteak, bere YouTubeko kanalean.