Partidu gutxiko asteburua izan da, bailarako eskubaloi taldeentzat. Helduenen taldeek bakarrik izan dituzte partiduak, gainerakoak atzeratu egin baitituzte. Horrela, ez dute jokatu infantilek, ezta kadeteek ere. Seniorrak eta jubenilak izan dira jokatzen bakarrak.
Hernaniko mutil seniorren taldeak, etxean zeukan hitzordua, kiroldegian, Gipuzkoako bigarren mailan. Oso partidu gogorra zeukaten, ligako bigarren sailkatuaren kontra: zortzi partidutik, zazpi irabazita zetorren Leizaran. Eta Hernanin ere, gehiago izan zen talde andoaindarra. Horrela, ezin izan zuten denboraldiko bosgarren garaipena lortu hernaniarrek, eta 20-27 galdu zuten.
Hernaniko neska jubenilek lortu zuten asteburuko garaipen bakarra, etxean, Ormaiztegiren kontra: 29-13 nagusitu ziren. Mutil jubenilek, berriz, Leizaranen kontra jokatu zuten, Andoainen; eta galdu egin zuten, partidu lehiatuan (32-30).