Hainbat ekintza antolatu dituzte Amher SOS Arrazakeria elkarteak eta Hernaniko Udaleko Kulturartekotasun Sailak, datorren asterako, bi data seinalaturen bueltan: Giza Eskubideen Nazioarteko Eguna izan zen ostiralekoa, eta Pertsona Etorkinen Nazioarteko Eguna, datorren larunbata. Hori horrela, migratzaileen eskubideak aldarrikatzeko astea izango da datorrena, hainbat ekintzaren eskutik. Ostiralean aurkeztu zuten egitaraua, Kulturarteko Plaza Feministan, antolatzaileek.
«Data egokiak dira, herrian arlo horretan egiten den lana azaleratzeko, eta baita konpromisoak hartzeko ere, oraindik lan haundia dagoelako egiteko», adierazi zuen Itsaso Lekuona Kulturartekotasun zinegotziak. Bide horretan, berretsi zuen Udalaren konpromisoa, «migratzeko eskubidea oinarri hartuta, herritar berriei harrera egiteko ahalik eta baliabide duin eta osoenak eskaintzeko».
Baliabide horien artean, Irantzu Jauregi Kulturartekotasun teknikariak nabarmendu zuen Harrera Integralerako Bulegoa, udaletxeko Herritarren Harrera Zerbitzuan egongo dena, «etorri berriei harrera patxadaz egin ahal izateko. Eta balioko digu, herriko argazkia osatu eta berritzeko». Otsailerako espero dute martxan egotea bulegoa. Horrekin batera, Amherrekin daukaten hitzarmena eta «urte askotako elkarlana» ere nabarmendu zuen. Eta goraipatu zuen, herrian espazio bat izatea «arrazakeriaren eta xenofobiaren kontrakoa»; Kulturarteko Plaza Feminista, hain justu.
Amherreko Fatima Ncirik eman zituen, bihar bertan hasiko den egitarauaren xehetasunak. Hitzaldi batekin ekingo diote, eta migrazioei eta klima aldaketari buruz ariko da Miguel Pajares antropologoa, migrazioetan aditua. Amherreko kideak, bestalde, Hernaniko Institutura joango dira bihar eta etzi, ikasleei azaltzera herriko etorkinen egoera zein den. Eta bihar bertan inauguratuko dute, Kulturarteko Plaza Feministan, Emakumea, migrantea eta bizilaguna erakusketa.
Zinkoeneatik Karabeleko zubira martxa, Bidasoa ibaiko heriotzak salatzeko
Eta asteazkenean izango ditu bi hitzordu, egitarauak. Aurrena, Paseko txoriak dokumentala jarriko dute, Irunen Frantziara pasa ezinik geratzen diren migratzaileen zailtasunei eta bertako GKEen laguntza eta babesari buruzkoa. 18:00etan jarriko dute, Plaza Feministan. Eta horren ondoren, elkarretaratzea deitu dute, 19:45etan Zinkoeneatik abiatuta, eta Karabeleko zubira joango dira, «Bidasoa ibaian gertatu diren migratzaileen heriotzak salatzeko».
Zentzu horretan, Lekuonak adierazi zuen «Europako mugak hilerri» bilakatu direla migratzaileentzat, «hemen ondoan, Irunen, ikusi dugun bezala».
Gertaera horiek salatzeko eta konponbidea bilatzea eskatzeko antolatu dituzte ekintzak datorren astean, eta herritar guztiak animatu nahi izan dituzte, horietan parte hartzera.
EGITARAUA Bihar, Hitzaldia: Migrazioak eta klima aldaketa, Miguel Pajares antropologo eta migrazioetan adituaren eskutik. 18:00etan, Kulturarteko Plaza Feministan. Bihar eta etzi, Amher SOS Arrazakeriaren hitzaldiak Hernaniko Institutuan, herriko etorkinen egoerari buruz. Abenduak 13-18, 'Jostailu bat, sarrera bat!' ekimena, Landaren. Hernani Club Rugby Elkarteak antolatuta. Informazio gehiago: hernanirugby.eus. Bihartik aurrera, Erakusketa: Emakumea, migrantea eta bizilaguna. Kulturarteko Plaza Feministan. Abenduak 15, Dokumentala: Paseko txoriak. Juanmi Gutiérrezek zuzendua, euskeraz, gaztelaniazko azpitituluekin. 18:00etan, Kulturarteko Plaza Feministan. Abenduak 15, Elkarretaratzea, migrazio bidean izandako hilketak salatzeko. Zinkoeneatik 19:45etan abiatuta, Karabeleko zubira. Abenduak 17, Migrazinea: Fahim. 17:00etan, Gaztelekuan. |