Puri-purian dago amiantoaren gaia, egun hauetan. Batetik, horri buruzko dokumentala sortu dutelako Asviamiek, Mondragon Unibertsitateak eta Basurde Produkzioakek: Hauts, amiantoaren kalteak jasotzen dituena, kaltetuen hitzetan. Eta Hernanin ere eskainiko dute, datorren asteartean, abenduaren 7an, arratsaldeko 19:00etan Biterin.
Eta bestetik, egun hauetan ere izaten ari dira amiantoarekin lotutako epaiketak eta sententziak. Horietako bat da, Donostiako Auzitegiak eman duen epaia, Jose Luis Garcia hernaniarra zenaren kasuari buruzkoa. Auzitegiak erabaki du, 143.716,03 euroko kalte ordaina eman beharko dietela Cofivacasa eta Sidenor enpresek, Garciaren alargunari eta seme-alabei. Orbegozo-Acenorreko elektrizista izan zen Garcia, eta mantenu lanetan aritu zen 1966tik 1993ra.
2016an diagnostikatu zioten biriketako minbizia, eta ebakuntza egin zioten; baina 2020an berriro eraman zuten ospitalera, biriketako minbiziak eta hezurretako zein burmuineko metastasiak eraginda. 2020ko maiatzaren 23an hil zen. Auzitegiak erabaki du, enpresek erantzukizuna daukatela Garciaren osasun kalteetan, amiantoarekin kontaktuan egon zelako.
Kontzentrazioa gaur, Donostiako Auzitegian
Gaur izango da beste epaiketa bat, amiantoarekin lotuta: Juanjo langileari eta Bekabi Eraikinak enpresa hernaniarrari dagokiena. Gizarte Segurantzak onartu zuen, langilearen pleura minbiziaren jatorria profesionala dela, eta ezintasun osoa aitortu zion. Asepeyo Mutuak, ordea, helegitea aurkeztu du, eta horri buruzko epaiketa egingo dute gaur. Asviamiek adierazi du, 49 urteko langilea amiantoarekin kontaktuan egon dela eraikinen errehabilitazio lanetan, honako enpresetan: Renovask, Restauobras, Teusa eta Bekabi. Baina Asepeyok dio, langilek ez zuela amiantoarekin kontakturik izan mutuak aseguratzen zuen Bekabi enpresan.
Asepeyoren jarrera salatu du Asviamiek, eta horregatik, kontzentrazioa deitu du gaurko, goizeko 09:40etatik 10:10etara, langileari babesa erakusteko