Jarduera berria jarri dute martxan Goiz Eguzki elkarteak eta Hernani Kirol Elkarteko boleibol sailak, elkarlanean; eta aitzindari izan dira Euskal Herrian, gainera: hartubolean ari dira, 65 urtetik gorako herritarrekin, astean bi aldiz.
Boleibolean oinarritutako kirola da hartubola, baina edozeinek jokatu dezakeena: «adina, sexua edota elbarritasuna ez dira oztopo jokatzeko, eta horretaz konturatzeko, kiroldegian egiten ditugun saioak ikusi besterik ez dago», nabarmendu dute.
Astearte eta ostegunetan elkartzen dira Hernaniko kiroldegian, eta egun bakoitzean bi txanda egiten dituzte: aurrenekoa 09:30etatik 10:30etara, eta bigarrena 10:30etatik 11:30etara.
Une honetan, 30 herritar ari dira hartubolean, emakume zein gizon. 65 urtetik gorakoak dira denak, eta 85 urte ingurukoek ere hartzen dute parte. «Gehienek ez dute aukerarik izan bere gaztetasunean kirola egiteko, eta orain ohartu dira, kirola egiteko bakarrik ez, partiduak jokatzeko ere gai direla», diote Goiz Eguzkiko eta Hernaniko boleibol taldeko arduradunek.
Mexikon, 35 urteko ibilbidea
Kirol berria da hartubola gurean, baina Mexikon 35 urtetik gora daramazkite horretan jokatzen, gobernuak bultzatuta, cachibol izenarekin. Euskal Herrian, probatzen aurrenekoak izan dira hernaniarrak; eta estatu mailan, Galizian eta Madrilen egin dute jardueraren bat.
«Herrialde bakoitzak izen bat jartzen dio, baina munduan zehar zabalduta dago modalitate hau; kasu batzuetan gaztetxoentzat, besteetan adin nagusikoentzat; eta Israelen, adibidez, Mamanet liga daukate, ama diren emakumeek bakarrik jokatzen dutena», azaldu dute.
Araudi bat prestatu dute Hernaniko boleibol taldeak eta Goiz Eguzkik: «eta dagoeneko, Donostiako zenbait jubilatu elkartek eskatu digute baimena, gurekin saio batzuk egin eta beraienean jarduera martxan jartzeko».
Hartubolaren inguruan, larunbatean argitaratuko du erreportajea Kronikak.
