Oso lehiatua ari da izaten, mutilen Ohorezko B Mailan, denboraldiaren aurreneko fasea. Eta horregatik, berebiziko garrantzia dauka partidu bakoitzak, eta puntuak launaka (edo bosnaka) pilatzeak. Hiru kontrario gogor dauzka Hernanik, A multzoko goiko aldean: Independiente, Pasek Belenos eta Getxo. Eta aurreneko fasea ez da luzea izango, itzuli bakarra jokatuko baitute: 11 partidu guztira.
Horregatik, eta hurrengo fasera hiru talde bakarrik sailkatuko direla kontutan hartuta, irabazi beharreko partidua daukate trikoloreek gaur, Eibarren. 16:00etan jokatuko dute Unben, eta Eibar izango dute aurrean, jokatutako bost partiduetatik bi irabazi dituen taldea. Jasotako porrotak, ordea, ez dira nolanahiko kontrarioekin izan: Getxok, Ourensek eta Independientek hartu dute mendean. Beraz, orain arteko emaitzak alde batera utzi, eta bere onena emateko prest zelairatu beharko dute hernaniarrek, berriro ere bost puntuak ekartzeko asmoz. Puntu bakoitza izan baitaiteke erabakigarria azkenean...