Udalak jakinarazi duenez, gaurtik hasita ostiralera arte, udal langileek asfaltatze lanak egingo dituzte herriko hainbat kaletan eta txokotan.
Autoak kentzeko abisua
Adierazi dutenez, gaurkoan prestaketa lanak egingo dituzte. Hain justu, Orkolaga Plaza osoan hesiak jarriko dituzte. Horrekin batera, asteazkenerako auto guztiak kendu beharko direla azpimarratu dute. Horrez gain, Perkaiztegi kaleko azken zatian, eskubiko aldean, hesiak jarriko dituzte autoak bertatik kentzeko. Izan ere, asfaltatu aurretik, ubidea berritu behar dute zati horretan.
Martxa hori hartuta, asteartean, Perkaiztegi kalean ubidea berritzeko lanei ekingo diete. Asteazkenean, berriz, Orkolaga Plaza asfaltatzen hasiko dira eta, horretarako, inguru guztia itxiko da. Ostegunean, margoketa lanak egin eta plaza irekiko dute. Egun horretan ere, Perkaiztegi kalea asfaltatzen hasiko dira, eta kalea guztiz itxiko da, garajeetako sarrera eta irteera egiteko izan ezik. Azkenik, ostiralean, Perkaiztegiko zonaldeko lanekin amaitu eta margoketa lanak egitea aurreikusi dute.