Zita garrantzitsua izan zuten atzo trikoloreek Landaren, Uribealdearen aurka. Bosgarren jardunaldia zuten atzokoa, eta azken bi partiduetako boladari eusteko asmotan atera ziren zelaira Ohorezko B mailako taldeko jokalariak. Eta egindako lanak fruituak eman zituen atzokoan, 43-8 irabazi baitzien Mungiakoei.
Hasierako minututik geldiezin, hernaniarrak
Taldeak ezin hobe hasi zuen norgehiagoka, eta, hasiera-hasieratik, Patrick Polidoriren mutilek argi utzi zuten sendo arituko zirela eta aurkariei ez zietela topaketa erraza jarriko. Hain justu, partidua hasi eta lehenengo minutuan, 5-0ekoa heldu zen Iker Burugainen entseguarekin. Dena den, berehala esnatu ziren aurkariak, eta 5-3koa egitea lortu zuten seigarren minutuan, zigor kolpe baten ondoren.
Minutuek aurrera egin ahala, Hernanik taldea indartu eta Burugainen bigarren entsegua heldu zen 21garren minutuan, markagailuan 10-3 aurreratuta. Martxa hori hartuta, geldiezin ibili zen hernaniar gaztea, hirugarrena egin baitzuen 25garren minutuan. Horrela, trikoloreek abantaila haundia lortu zuten, 15-3ko aldearekin. Atsedenaldira heldu aurretik, ordea, bisitariek entsegua egin eta 15-8koarekin joan ziren aldageletara.
Bigarren zatiari gogor ekin zioten etxekoek, eta 48garren minutuan Jon Ander Zapiainen entseguarekin eta Anartz Elosegiren transformazioarekin 22-8koa lortu zuten. Segituan egin zuten aurrera, Beñat Arizetaren entseguarekin eta transformazioarekin, 29-8koa osatuz. Indartsu jarraitu zuten hernaniarrek, eta markagailua 36-8an jarri zuten Xaboren entseguarekin eta Arizetaren transformazioarekin.
Azken hamar minutuetan ere Hernanik tinko heldu zion garaipenari. Horrelaxe heldu ziren, hain justu, partiduko azken tantoak: Martxel Aramendiren entsegua eta Arizetaren transformazioa.