Partiduz josita dator asteburu honetako jardunaldia Hernaniko boleibol taldeentzat. Denera, 10 taldek jokatuko dituzte norgehiagokak gaur eta bihar. Kadete mailako nesken taldeak bihar du zita, Lasarten, Ostadarren aurka; gainerako guztiek, berriz, gaur neurtuko dituzte indarrak txapelketako beste taldeen aurka.
Euskal Liga, kiroldegian
Asteburuko protagonistak izango dira Euskal Ligako talde hernaniarrak. Izan ere, bi talde nagusiek etxean jokatuko dute gaurkoan. Emakumezkoek irekiko dute arratsaldeko txanda, 16:30etan hasita, Errioxako Haroren kontrako lehian. Joan den asteburuan atsedena izan zuten Hernanikoek, eta, geldialdiaren ostean, garaipenaren bila aterako da Aitor Lizarazuk gidatutako taldea.
Gizonezkoek, aldiz, 18:45etan dute partidua. Bera Bera izango dute aurrez aurre, txapelketako laugarren jardunaldian. Joan den astean Navarvoleiren aurka 3-1 galdu ostean, hernaniarrek gogotsu hartuko dute erronka.
Bestalde, gaur 12:00etan, infantil nesken zein mutilen partiduak izango dira kiroldegian.