Gogotik egin behar izan zuen lan Navarvolei taldeak, azkeneko bi urteetako txapeldunak, Hernani mendean hartzeko, mutilen Euskal Ligan. Baina azkenean, saririk gabe bueltatu ziren hernaniarrak Berriozartik (3-1).
Aurreneko bi jokoetan, ezinean aritu ziren Eligio Rodriguezen mutilak, eta 25-15 eta 25-18 nagusitu zen Navarvolei. Baina hortik aurrera, bere maila onena erakutsi zuen Hernanik. Erraz irabazi zuten hirugarren jokoa (13-25), partidua bizirik mantentzeko; eta gogotik estutu zuten Navarvolei laugarrenean. Azkenean, ordea, talde nafarra nagusitu zen (25-23).
Taldean aldaketa ugari izan ondoren, oraindik bere joko onena lortu ezinik dabil Hernani; baina ziur daude, denboraldiak aurrera egin ahala, partidu ederrak jokatuko dituztela.
Gainerako kategorietan, lau partidu jokatu zituen Hernanik; eta horietatik hirutan lortu zuen garaipena. 0-3 irabazi zuten mutil jubenilek, Goierriren kantxan. 23-25, 13-25 eta 19-25 nagusitu ziren hernaniarrak. Hasi berriak izanik, ikasten ari dira, baina bitik bi irabazi dituzte.
Neska kadeteetan, berriz, jokatutako bi partiduak irabazi zituzten, partidua hasieratik ondo bideratuta. Fortuna 2 hartu zuen mendean Hernani 1 taldeak, nagusitasun haundiz: 25-16, 25-10 eta 25-18. Eta erraz nagusitu zen Hernani 3 ere, Herrikide Bren kontra: 25-12, 25-11 eta 25-14. Hernani 4 taldeak, aldiz, ez zuen jokatu, Herrikide A ez zelako azaldu, jokalari asko gaixo zituela eta. Azkeneko unean jakinarazi zuten, eta lehiaketako epaileen esku dago emaitza, orain.
Eta neska infantiletan, azkenik, galdu egin zuen DBH Hernani 2 taldeak, Herrikide Tolosa B taldearen kantxan. Azkeneko laurdenean bakarrik izan ziren gai, kontrarioei aurre egiteko 25-14, 25-11 eta 25-18.