Gaur emango dio hasiera Mendiriz Mendik, urteroko hitzordu nagusienetako bati: Mendizale Astea ospatuko dute, ostiralera bitartean. Eta horretarako, proiekzio bana prestatu dute egunero, 19:30etan hasita Biterin.
Urmuga dokumentala izango da aurrenekoa, gaur iluntzean; eta bertan izango dira Felipe Uriarte eta Mattin Zeberio, dokumentalari buruzko azalpenak emateko. Mendi eta musika abentura bat jasotzen du Urmugak. 19 etapako ibilaldia egin dute, 2020ko uztailean hasita; eta ibilbidean zehar, hainbat formatutako 10 kontzertu eskaini dituzte, ingurune naturalean.
Bihar, berriz, Flora en las altas cumbres del Pirineo proiekzioa eskainiko dute Olatz Fernandezek eta Maria Jesus Herrerosek. Landuko dute, nola eragin dezakeen mendizaleen presentziak eta klima aldaketak, mendirik altuenetan eta bertako biodibertsitatean. 2012an hasi zuten proiektua, eta Pirineoetako gailurrak izan dituzte aztergai.
Hurrengo bi egunetan, abentura bana ekarriko dute Biterira, gonbidatuek. Asteazkenean, Iran skiekin proiekzioa eskainiko du Ekain Alvarezek. Aurreratu du, herrialde ezezaguna dela, udara bero eta lehorrekin, baina negu hotz eta elurtsuekin: «hiru lagun eskiatzailek behar dutena».
Eta ostegunean, Unai Goikoetxeak ekarriko ditu bere bizipenak, Costa Brava eta Rias Baixas piraguan proiekzioarekin.
Astea bukatzeko, Mendizale Asteko Argazki Lehiaketaren sariak banatuko dituzte ostiralean, 19:30etan Biterin. Eta ondoren, elkarteak urtean zehar egindako jardueren irudiak proiektatuko dituzte bertan.