Epaileak bukaera adierazi zuenean, jokalarien pozak eta zaleen txalo zaparradak argi erakutsi zuten hori: gogorra izan zen atzoko partidua, Landaren. Estu hartu zuen Ourensek Hernani, eta garaipena Galiziara eramango zutela ere bazirudien, 20 minuturen faltan 7-14 aurretik zeudenean. Baina orduan erakutsi zuen bere maila onena Hernanik, eta markagailua erabat irauli zuen, 29-14 irabazi eta bost puntu eskuratzeko: garaipena eta erasoko bonusa.
Oso berdindua izan zen aurreneko zatia, eta Mattin Colladorena izan zen entsaio bakarra, ostikoz egindako pase bat aprobetxatuz, atsedenaldira aurretik iristeko (7-6). Oso bestelakoa izan zen bigarren zatia, ordea; gorabeheratsua. Partidua irabazteko asmoz zelairatu zen Ourense, eta estu hartu zituen trikoloreak, ezinean. Horrela lortu zuten aurreneko entsaioa galiziarrek, 53garren minutuan. Eta berehala iritsi zen, partidua aldatu zuen jokaldia: falta gogorra egin zuen Ourensek, eta liskarra sortu zen jokalarien artean. Bi taldeak geratu ziren jokalari bat gutxiagorekin, eta erabakia aldatu zuen epaileak: zigor kolpea Ourenserentzat, zaleen protesta artean. 7-14 aurreratu ziren galiziarrak horrela. Baina jasotako kolpeak, Hernaniren onena atera zuen: sekulakoa izan zen trikoloreen erantzuna, eta maila ederrean aritu ziren, partiduaren bukaerara arte.
Jokoan erabat nagusitu, eta berehala lortu zuen entsaioa Pepelu Abeciak, 12-14 gerturatzeko. Jaun eta jabe izaten jarraitu zuen Hernanik, baina 73garren minutura arte itxaron behar izan zuen, merezitako saria jasotzeko. Maul batekin aurrera egin, ezker hegalera zabaldu, eta Eñaut Gorostidik lortu zuen entsaioa, markagailuan aurrea hartzeko (17-14). Tartea txikia zen, baina ez zioten aukerarik eman Ourenseri, beste bi entsaio lortu baitzituzten segidan: Aimar Gorrotxategiren korrikaldi luzearekin bat, eta maul eder batean epaileak zigor entsaioa adierazita bestea. Horiekin eskuratu zuten erasoko bonusa.