Denboraldiko hirugarren partidua jokatuko du Hernanik gaur, Ohorezko B Mailan; eta bigarrena izango da etxean: Ourense hartuko dute trikoloreek Landaren, goizeko 11:30etan hasita.
Galiziarrek ondo ekin diote denboraldiari, aurreneko bi partiduak irabazita; baina garaipena lortu beharra dauka Hernanik, aurreneko postuetara bueltatu eta Getxon jasotako kolpea atzean uzteko. Kontrario zuzena dira bizkaitarrak, eta galdu egin zuen Hernanik han, bigarren jardunaldian.
Ordutik, baina, asteburu batez atseden hartu dute trikoloreek, eta porrota ahazteko ez ezik, zuzendu beharrekoak zuzentzeko ere izan dute aukera. Gaurkoan ez dute hutsik egin nahi, Landarera hurbilduko diren zaleen aurrean.