Ez da nolanahiko partidua izango azaroaren 17koa, CD Hernanirentzat: Errege Kopan ariko da, Victoria taldearen kontra, lehenengo faseko kanporaketan. Ez dira Zubipen ariko, ordea, A Coruñan baizik. Eta horregatik, inoiz baino ozenago egin diete deia zaleei, mutilen talde nagusia animatzera joateko. Horretarako, autobusa jarri du CD Hernanik, A Coruñara. Partiduaren egunean bertan, Atsegindegitik abiatuko da goizeko 08:00etan; eta partiduaren ondoren egingo dute bueltako bidea.
«Autobusa antolatu nahian gabiltza, gure jokalariek zaleen berotasuna izan dezaten A Coruñan», azaldu du CD Hernanik: «beraz, Galiziarako autobusa betetzeko erronka da zaleok jokatzen dugun partidua», animatu dituzte herritarrak.
Izenematea ostiralera arte, Zubipen eta Rioja tabernan
Joan nahi duenak, datorren ostiralera arte dauka izena emateko aukera. Zubipeko kantinan edo Rioja tabernan egin daiteke, eta 50 eurokoa da prezioa, autobusa betez gero.
Ez da nolanahikoa, berdeek A Coruñan lortu dezaketen saria. Victoria menderatuz gero, etxean jokatuko luke Kopako bigarren faseko partidua Hernanik; eta kontrarioa goi-mailakoa izango litzateke, ziur: Espainiako lehenengo mailako talde baten kontra jokatuko lukete hernaniarrek, Zubipen.