KOSA (Koronabirus Osteko Sexu Askapena) hausnarketa zikloa jarri du martxan Ehgam elkarteak; Euskal Herriko Sexu Askapenerako Mugimenduak, hain justu. Hainbat saioa antolatu dituzte, eta joan den asteazkenean Arrasaten hasitako bideari, gaur emango diote segida Hernanin: Urumea Herrigunean egingo dute bigarren saioa, 18:30etan.
Saio horretan, galdera bat izango dute, talde hausnarketarako abiapuntu: Zer egin erasoen aurrean? Horrela, landuko dute zein den erantzun egokiena LGTB+ fobiaren aurrean, gorroto diskurtsoen aurrean, edozein motatako erasoren aurrean, hilketen aurrean... «Emakumeek* zein zisheteronormaren beste aldean bizi garen errealitate guztiek lortu ditugun urratsen aurrean, faxismoaren gorakadak eta jarrera erreakzionarioek laguntzen dute erasoak eta horien birulentzia areagotzen. Horregatik, ziklo honetan ezinbestekotzat jotzen dugu gogoeta egitea denon artean, errealitate gordin horri eman nahi diogun erantzunari buruz. Horretarako, gonbidatzen zaituztegu gai horien inguruko eztabaidarako eta arakatze kolektiborako gune honetara. Lege gehiago izateak, hobeto babesten al gaitu? Zigor haundiagoek gehiago babesten gaituzte? Zer hartu beharko luke kontuan sexu askapen mugimenduak gai horren inguruan? Nola indartu dezakegu autodefentsa eta antolaketa LGTB+ fobiaren aurrean?».
Ziklo berri baten hasiera, Ehgam elkartean
1976an sortu zen Ehgam elkartea, Euskal Herrian lehenengo LGTB+ eragilea izanik. Aurten, belaunaldi berri batek hartu du lekukoa, «ziurgabetasun eta prekarietate sozialaren, oinarrizko eskubide urraketen eta gorroto diskurtsoen zein eskuin faxistaren gorakadaren giroan». Eta ziklo berriari hasiera emanez, KOSA hausnarketa zikloa antolatu du, Ehgam «berrirudikatzen, berpentsatzen, berformulatzen, berrarmatzen eta berramesten laguntzeko prozesu gisa».
Saioetan parte hartzeko, internet bidez eman daiteke izena, kosa.ehgam.eus webgunean. Zikloari buruzko informazio guztia aurkitu daiteke bertan, eta Twitter, Facebook eta Instagram sare sozialetan, @kosa_gara eta @ehgam_gara kontuetan.
Etzi izango da hirugarren saioa, Bilboko Karmelan goizeko 10:00etan hasita, mahai inguru eta elkarrizketa kolektiboekin