Pedro Pablo Garcia hernaniarrak hitzaldia eskainiko du bihar, Koldo Mitxelenan. 19:30etan emango dio hasiera saioari, eta bere tesiaren gainean arituko da: Gipuzkoako biztanleen lankidetza eta erresistentzia, okupazio napoleonikoaren lehen erdian zehar (1808-1810).
Hitzaldia gaztelaniaz izango da, eta Garciak agerian utziko ditu azkeneko bi mendeetan gaiari buruz sortutako mitoak, «interpretazio historiko-tradizionala ezeztatuz».
«Hernanin garai hartan gertatutako gauza dexente aipatuko ditut»
Aurreratu duenez, Gipuzkoa «bere osotasunean» aztertuko du, baina, batez ere, Hernanin jarriko du fokua: «nire herrian, garai hartan gertatutako gauza dexente aipatuko ditut». Hitzaldira bertaratzeko aukera ez dutenek, streaming bidez jarraitu ahal izango dute, Foru Aldundiko Kultura, Lankidetza, Gazteria eta Kirol Departamentuaren webgunean: kmk.gipuzkoakultura.eus.