Hernanira etorri dira, aurten, ehiza txikiko Gipuzkoako eta Euskadiko txapelak. Izan ere, balentria ederra borobildu du Asier Arrizabalagak, Txantxangorri elkarteko ehiztariak: ehiza txikiko bi txapelketak irabazi ditu berak, txakurrarekin.
Urriaren 3an jokatu zen aurrenekoa, Gipuzkoako Txapelketa, Arabako Zanbrana herrian, bertako gazteluko ehiza esparruan. Eta probintziako partehartzaile guztien artean, onena izan zen Arrizabalaga.
Baina hori nahikoa ez, eta Euskadikoan ere nagusitu zen Txantxangorriko ehiztaria, hurrengo asteburuan. Zanbranako gazteluan zeukan bigarren hitzordu hori ere, urriaren 10ean. 25 ehiztarik hartu zuten parte, probintzia bakoitzeko onenek; eta denetan onena izan zen Arrizabalaga, nabarmen gainera: 10 eper bota zituen berak, eta alde haundiarekin nagusitu zen, Ivan Bello bigarren sailkatuaren eta Mikel Iturralde hirugarrenaren aurretik.
Bata bestearen segidan lortutako txapela horiekin, bere palmares oparoa haunditu du Arrizabalagak, eta bere ehiztaria zoriondu nahi izan du Txantxangorri elkarteak.