Urtebete luzeko geldialdiaren ondoren, bueltan da, berriro ere, Züttik Elektrotxaranga. 2019an sortu zuten Hernaniko eta Ordiziko 13 lagunek, eta, gaur egun, bueltan diren honetan, taldekide hernaniarrek soilik osatuko dute banda. Horren bueltan, eskerrak eman dizkiete taldea utzi dutenei, «plazera izan baita haiekin elkarlanean aritzea».
Erronka: abenduan jotzea
Pandemiak bete-betean oztopatu zuen taldearen jarduna; baina, orain, «indarberrituta eta ilusio haundiz» bueltatu dira entseguetara.
Adierazi dute zehaztutako erronka nagusia dela abenduan lehenengo kontzertua eskaintzea. Gainera, Gabonetan, Hernanin, sorpresaren bat egon daitekeela aurreratu dute taldekideek. Hala ere, momentuz, egutegian konfirmatutako lehenengo geldialdia Antiguoko gazte koadrilen bazkarian izango da, urtarrilaren 22an.