Oinharri Eskolak antolatuta, joan den asteartean hasi zen formakuntza politikoari buruzko nazioarteko esperientzien Hitzaldi Bira. Urriaren 22an amaituko dute egitaraua, eta, horren barruan, gaur, Plaza Feministan egingo dute geldialdia. Arratsaldeko 18:00etan hasita, Haurren heziketa eta formazio politikoa, Nazioarteko eta bertako esperientzien trukaketa mahaingurua eskainiko dute.
«Formakuntza politikoaz eta haurren heziketaz hausnartzera gonbidatu nahi dugu euskal jendartea», aipatu dute antolatzaileek. Gaurkoan, parte hartuko dute Jennifer Milagros Lamus Ramos eta Albanys Montilla Venezuelako militante komuneroek; Rosana Fernades Brasilgo MSTko eta ENFFko kideak; eta Jamila El Abboudi Marokoko formakuntza eskolako kideak. Gainera, Kanika Aisialdiko taldeko ordezkariak eta Oinherri herri hezitzaileak sustatzeko elkarteko partaideak ere bertan izango dira.
Herritar guztiei luzatu diete gaurko hitzaldira bertaratzeko deialdia.