Urte eta erdiko etenaldi luzearen ondoren, bueltan da adineko hernaniar askorentzat asteroko zita fijoa izaten zena: datorren asteazkenean bueltatuko da Ttapa-Ttapa egitasmoa, herriko kaleetara. Ohi bezala, Atsegindegin jarriko dute hitzordua, goizeko 10:30etan. Eta bertan elkartuta, paseoan abiatuko dira, ibilbide ezberdinak egiteko.
Ibilbide osoan zehar, partehartzaileek lagun izango dituzte boluntarioak, Ttapa-Ttapako partaide diren elkarteetakoak.
Plaza kopuru mugatua, eta izena eman beharra
Pandemiaren aurreko dinamikari helduko diote berriro, eta asteazkenero elkartuko dira Ttapa-Ttapa egitasmoaren eskutik. Baina bada nobedaderik, oraingoan: mugatua izango da partehartzaile kopurua. Horregatik, parte hartu nahi dutenek aldez aurretik eman beharko dute izena: Biteri kultur etxean, edo 943 57 54 31 telefonora deituta (08:00etatik 14:00etara).
Dozenaka lagun elkartu ohi ziren asteroko bueltaxka egiteko, eta gogotsu izango dira, berriro ere martxa hartzeko.