Lau eguneko oporraldi laburraren hasiera zen atzokoa, herritar askorentzat; eta ez dira gutxi izango, kanpora bidaiatxo bat egiteko aprobetxatu dutenak. Baina, zubiak zubi, ez ziren gutxi izan, atzokoan Hernaniko kaleetan zebiltzanak, eta hileko bigarren larunbateko azokak bisitatzeko aprobetxatu zutenak. Izan ere, Bigarren Eskuko Azoka jarri zuten Urbieta kalean, ohi bezala; eta Behemendiko Azoka Ibiltariak hartu zuen Plaza Berri. Eta makina bat herritar ibili ziren postuz postu, bigarren eskuko liburu, jostailu, tresna edota arropa interesgarrien bila, batean; eta bertako produktu goxoak erosteko asmoz, bestean. Azaroan izango dute hurrengo hitzordua, bi azokek.