Joan den larunbatean izan zen Hernaniko Liburu Azoka aurrenekoz, Dobera Euskara Elkarteak antolatuta, Hitz Andana jaialdiaren barruan. Eta jende asko gerturatu zen, 12 argitaletxe eta ekoizlek jarritako postuetara, liburu aurkezpenetara eta emanaldietara. Eta bizitako egunarekin pozik, eskerrak eman nahi izan dizkie Doberak denei: «mila mila esker bertaratu zareten guztioi, egitaraua osatzen lagundu diguzuenoi (Udal teknikari eta langileoi, Gorka Olazabali, liburuaren aurkezpena egin duzuenoi, Hernaniko Kale Literatura taldeari, Sorgina Txirulinari...), eta bereziki 12 argitaletxe eta ekoizleei; zuengatik ez balitz, ez genukeelako izango Azoka ospatzeko aukerarik. Segi dezagun euskerazko liburuak ekoizten eta irakurtzen!».