Hitzordu berezia jarri du Txantxangorri elkarteak, bihar iluntzerako: Sagardo Eguna ospatuko dute, Euskal Sagardoaren babes eta laguntzarekin, elkartean bertan. Hain justu, Euskal Sagardoaren arduradunen hitzaldi batekin hasiko dute ospakizuna, eta ondoren, Jatorri Izendapena duten sagardoekin egingo dute dastaketa, afari batekin borobilduko dutena. 60 lagunek eman dute izena, parte hartzeko.
Bestalde, Txantxangorrik jakinarazi du, dagoeneko ekin diola ehiza postuen zozketak egiteari, udazkenean sartzearekin batera. Aritzmendi-Altzea, Larre Gain-Akola eta Azketako postuak zozketatzen dituzte egunero, iluntzeko 20:00etan; eta orduan banatzen dituzte txartelak. Beraz, bazkideek 20:00ak arte eman dezakete izena egunero, elkartean bertan, zozketan parte hartzeko.