Hitz Andanako laugarren edizioa gaur hasiko da eta larunbatean amaituko da. Gaur, Ez da kasualitatea bertso saio musikatua izango da, 19:00etan, Biterin. Lau bertsolari igoko dira oholtza gainera: Nerea Ibarzabal, Uxue Alberdi, Onintza Enbeita eta Ane Labaka. Gai-jartzaile lanetan, berriz, Amaia Agirre arituko da. Horiez gain, musikariak ere izango dira saioan: Ixak Arruti gitarran eta Gari Otamendi biolinarekin.
Joxan Goikoetxea eta Karlos Linazasoro, bihar
Joxan Goikoetxearen eta Karlos Linazasoren txanda izango da bihar. Esaten dugun argia lana aurkeztuko dute. Linazasoro idazlearen poema liburu berria da, eta poesia horietako zenbait irakurriko ditu egileak, Goikoetxea musikariaren laguntzarekin. Saioa arratsaldeko 19:00etan hasiko da, eta hori ere Biterin izango da
Programazioarekin jarraituz, ostiralean Hnuy illa eta Sorginak eta larunbatean, sorginkeriak emanaldiak izango dira. Horietarako, sarrera salgai dago 8 euroan. Bestelakoan, antolatutako gainerako ekintzak doakoak dira. Hala ere, beharrezkoa da gonbidapenak aurretik eskuratzea online www.kultur.hernani.eus webgunean edo, bestela, Biteriko leihatilan.