Koxka Elkarteak 2021eko Ondarearen Europako Jardunaldietan parte hartuko du Xuhurra ipuinarekin. Ekitaldia urriaren 5ean izango da 18:00etan Biteri Kultur Etxean. Ipuinaren irakurketa egingo da eta zeinu hizkuntza ere erabiliko da.
Xuhurra ipuina «desgaitasuna duten pertsonek egina izan da. Hortaz, desgaitasuna dutenek egunero gainditu behar dituzten trabak dira ipuinaren argumentua. Injustiziak jasaten dituzten bestelako taldeak ere azaltzen dira: emigranteak, etxetik kalera bidalitako jendea, banketxeen abusuak pairatutako aiton-amonak… beraz, ipuin osoa da gizarte honen alde ilunaren ispilua eta salaketa».
Testua braileraz ere argitaratu zen eta Miguel Oribek egindako irudiek erliebea dute itsuek antzemateko. Elkarrizketa ugari ditu ipuinak, eta denak ere hika daude idatziak. Eta hori ere bada ondare ukiezin edo bizia. Ipuinaren irudi eta eszena guztiak dira desgaitasuna duten pertsonek bizitako esperientzi errealak.