Esanahi bereziko partidua jokatuko du Hernanik gaur, Zubipen, mutilen Ohorezko Erregional mailan. Eibar izango du aurrean, joan den igoera fasean semifinaletan kanporatu zuen taldea; eta errebantxa hartu nahiko dute berdeek. Arratsaldean izango da hori, 16:00etan hasita.
Errebantxatik harago, edonola ere, partidu garrantzitsua izango da berdeentzat, aurreneko garaipenaren bila aterako baitira zelaira. Orain arte jokatutako biak berdindu dituzte, eta puntuak hirunaka pilatzen hasi beharra daukate, beste denboraldi batez igoeraren lehian aritu ahal izateko.
Zubipen ez, kanpoan ariko da Hernani, nesken Ohorezko Erregional mailan. Estreinako jardunaldian Beti Gazteren kontra galdu ondoren, Bergararen zelaian bilatuko dute aurreneko garaipena, gaur arratsaldean, 16:30etan Ipintzan.
Eta kanpoan ariko da mutil jubenilen taldea ere, Liga Nazionalean. Lezaman jokatuko du, Athleticen bigarren taldearen kontra, bihar 17:00etan.
Mundarroren bi talde nagusiak, etxetik kanpo
Zubipen bezala, izango da partidurik asteburuan, Zarkumendegin ere. Baina etxetik kanpo ariko dira moreen bi talde nagusiak, Erregional Preferentean. Zizurkilen jokatuko dute mutilek, Danenaren kontra. Elbarrena zelaian izango da, gaur arratsaldeko 16:00etan hasita; eta aurreko asteburuko garaipen sendoari segida eman nahi diote moreek, bigarrena lortuta.
Nesken taldeak, berriz, Donostian dauka hitzordua gaur, Matigoxotegin: Irauli Bostekoren kontra jokatuko du, arratsaldeko 17:30etan hasita. Ibilbide hasi berriko aurreneko partiduan, 1-0 irabazi zuten Hernaniren kontrako derbia; eta beste horrenbeste lortzeko asmoz joango dira, kanpoan jokatuko duten aurreneko partidura. Maila berean, Zubipen jokatuko dute Hernaniko neskek, Usurbilen kontra, bihar 12:00etan.
Eta derbi bat ere izango da Zubipen bertan, asteburu honetan: mutil jubenilen lehenengo mailan, elkarren kontra ariko dira Hernani eta Mundarro, gaur arratsaldeko 19:00etan.