Asteburu honetan hasiko dituzte txapelketa ofizialak, Hernaniko eskubaloi taldeek. Zehazki, hiru izango dira ligari ekingo diotenak: neska zein mutil jubenilen taldeak, eta mutil kadeteena. Gainerakoek, lagunartekoak jokatuko dituzte.
Gaur izango dute ligako estreinakoa, jubenil mailako bi taldeek. Neskek etxean egingo dute debuta, gaur arratsaldeko 18:00etan. Saieko hartuko dute, kiroldegiko lehenengo pistan. Mutilek, berriz, Andoainera joan beharko dute goizean: Leizaran izango dute aurrean, Allurralde kiroldegian, 10:00etan hasita.
Mutil kadeteen taldeak, bere aldetik, bihar eguerdian dauka hitzordua, Hondarribia. Hondartza kiroldegian ariko da, Hondarribiaren kontra, 12:00etan.
Lagunarteko partiduei dagokienez, Hernanin bertan izango dira hiru, gaur goizetik eguerdira bitartean, kiroldegiko bigarren pistan. Saieko izango dute aurrean, Hernaniko hiru taldeek: 10:00etan jokatuko du aurrenekoa, neska infantilen taldeetako batek; eta segidan, neska infantilen beste taldeak jokatuko du 11:15etan hasita. Mutil infantilek jokatuko dute hirugarrena, 12:30etatik aurrera.
Neska kadeteek, aldiz, Donostian izango dute lagunarteko partidua, bihar goizean. Paco Yoldi kiroldegian ariko dira, Irauli Bosteko taldearen kontra, 11:00etan hasita