Hilaren 28ra arte dago aukera Dobera Euskara Elkarteak antolatutako II.Kromiki lehiaketan parte hartzeko. Lan hauek euskarri fisikoan zein digitalean aurkeztu daitezke: dobera@dobera.eus helbide elektronikora idatzia. Kromikigilearen datuak, aurkeztutako lanaren atzeko aldean edo beste orri batean aurkeztu beharko dira: izen abizena, telefono zenbakia, adina eta posta elektronikoa.
Aurtengoa bigarren edizioa da eta, iaz moduan, Kromikiek Hernanirekin zerikusia izan beharko dutela jakinarazi du Dobera Euskera Elkarteak: «Euskeraz idatzitakoak izango dira eta 26 x 7,3 zentimetrotako tamainakoak: Kronikan agertzen diren Kromikien antzera».
Aurtengo lehiaketa gainera, hiru adin tarte ezberdinetan banatu dute. Haurren talde bat, 6 eta 11 bitarteko adin tartea duena. Gainera talde honetan ez da lehiaketarik egingo; «hainbat sari zozketatuko dira». Bigarren taldea, 12 eta 17 urte bitarteko gazteena da, eta saria Kromiki onenari emango zaio. Helduen taldea ere badago, 18 urtetik gorakoentzat; «hemen ere Kromiki onenari emango diogu saria».
Gogoratu urriaren 2an, aurkeztutako lan guztiak egongo direla ikusgai, Doberak antolatuko duen I. Liburu azokan.