Joan den ostiral, larunbat eta igandean Euskal Jaietan oinarritutako hainbat kultur ekitaldi antolatu ziren, eta herritarrek gozatu ederra hartu zuten. Larunbatean, herri kirolak ikusteko aukera izan zen Atsegindegin eta jarraian, balkoitik balkoira bertsoak bota zituzten Eli Pagolak, Agin Laburuk, Oihana Iguaranek eta Xebastian Lizasok; gai jartzaile lanetan aritu zen berriz Asier Azpiroz. Hernaniko Musika Bandak ere kontzertua eskaini zuen Gay Murren, eta herritar ugari bertaratu ziren. Eguna borobiltzeko, gauean, Ereñotzun, Ruper Ordorikaren abestiek agurtu zuten larunbata.
Igandean, goiz esnatu zen herria txistulari bandarekin, eta eguerdian trikitixak girotu zuen Atsegindegi. Arratsaldean pelota partiduak jokatu ziren, eta azkenik, GenEroa emanaldiarekin agurtu zituzten Hernaniko Euskal Jaiak.