Euskal Jaietako hainbat ekintza izango dira asteburu honetan, Hernanin; eta horien artean, ez dira faltako bertsoak ere. Baina ez da ohiko saioa edo jaialdia izango, Paulo Ttikiya bertso eskolak eta Ohitura Zaharrak taldeak elkarlanean antolatu dutena: Balkoitik balkoira jarriko dituzte bertsotan, Biteriko plazan, Eli Pagola ereñotzuarra, Agin Laburu astigartarra, Oihana Iguaran eta Sebastian Lizaso. Asier Azpirozek jarriko dizkie bertsotarako gaiak.
Bihar izango da hori, arratsaldeko 19:00etan hasita. «Pandemia dela eta, balkoiek zeresana eman dute. Sozializatzeko ezohiko gune izan dira, besteen alde lanean ari zirenei txalotzeko leku... Hamaika ekintza antolatu dira bertan. Eta bestalde, garai batean, balkoitik balkoira bertsotan aritzen zireneko bertso saioen berri ere izan dugu», azaldu dute antolatzaileek.
Horregatik antolatu dute bertso jaialdia, «uztartuz etxean sartuta egon behar izan genueneko egun haietan balkoian emandako une ezberdinak, eta garai batean bertsolariak bertsotan aritzen ziren saioak».
Bihar bertan, herri kirolen erakustaldia izango da eguerdian, 12:00etan Atsegindegin; eta Musika Bandaren kontzertua arratsaldean, 19:00etan Urumea ikastolako patioan.