Izatez, festa giroan behar zuen Zikuñaga auzoak, asteburu honetan. Baina osasun egoerak hala eskatuta, ez da auzoko jairik izango aurten ere, bigarren urtez jarraian. Horregatik espero du Zikuñagako Ama auzo elkarteko jai batzordeak, datorren urtean «gure jaiak familian ospatzeko aukera izatea», eta bueltan izatea «alaitasun egunak».
Baina ez dira hutsean igaroko, aurtengo egun seinalatuak ere: Zikuñagako Amaren omenezko meza egingo dute auzoko eskoletan, gaur bertan, goizeko 11:00etan hasita.
Ez da elizkizun arrunta izango, gainera: Ereñotzuko Ozenki abesbatzak ere hartuko du parte bertan, eta zenbait abesti eskainiko dizkie bertaratuei.
Berezia izateko beste motiborik ere badauka mezak: martxan dira Zikuñagako Amaren ermita berreraikitzeko obrak, auzoaren goiko aldean; eta bi hilabete inguruko epean egongo dira bukatuta.