Oso aste berezia izaten da hau, urtero, erremontearentzat. Buruz buruko finalaren astea da, larunbatean jokatuko baitute, Galarretan, Endika Barrenetxea hernaniarrak eta Javier Urriza iruindarrak. Eta ohi bezala, hitzordu nagusiaren aurretik, beste zenbait ere badauzkate biek. Horrela, gaur bertan egingo dute finalerako materialaren aukeraketa, eguerdiko 12:00etan Galarretan: hiru pelota hautatuko ditu bakoitzak. Eta ondoren, ohiturari jarraituz, buruz buruko txapeldun izan direnekin argazkia eta bazkaria egingo dute.
Larunbat arratsaldeko finala izango da astearen ginda, eta hori barrutik bizitzeko aukera eskainiko die Kronikak, Kronikalari edo Doberako bazkide direnei. Izan ere, 10 sarrera banatuko ditu beraien artean. Eskuratu nahi dituztenak, bulegotik pasa daitezke (Larramendi kalea 11, behea), edo telefonoz deitu, 943 33 08 99 edo 688 660 714 zenbakietara, ostiralera arte. Bakoitzak bi sarrera eskuratu ditzake, gehienez ere; eta eskatutako ordenean banatuko dira.