Ekimen berri bat prestatu du Felix Ugarte Elkarteak, familiartean gozatzeko. Irailaren 17an izango da, eta Gure bizilagunik onenak egitasmoaren baitan, Xaguxarren Gaua ospatuko dute. Sagastialdeko atletismo pistaren sarreran jarri dute hitzordua, arratsaldeko 19:30etan; eta bertatik abiatuta, ibilbide labur bat egingo dute Hernaniko haur eskolaren inguruan.
Ibilbide horretan, batetik, erakusketa bat ikusteko aukera izango dute, xaguxarretara eta beraien bizimodura gerturatzeko. Eta ondoren, detekzio jardunaldia ere prestatuko dute Felix Ugarte Elkarteko kideek, Hernaniko Udalaren babesarekin.
Ez da kasualitatea, detekzio jardunaldia antolatu izana. Eta ez da kasualitatea, era berean, Iturmendiko jentilzulotik gertu ospatzea Xaguxarren Gaua. Izan ere, xaguxarrak ikertzen ari da talde bat bertan, eta xaguxarren joan-etorriak detektatzeko aparatuak jarri dituzte Iturmendiko jentilzuloan.
Ekintzan parte hartzeko, izenematea etzi arte
Familian eta gaztetxoekin gozatzeko modukoa izango da ekintza, baina mugatua izango da partehartzaile kopurua. Zehazki, 50 lagunentzat izango da tokia bertan. Horregatik, aldez aurretik eman beharko da izena.
Gaurtik aurrera apuntatu daiteke, eta etzi izango da azkeneko eguna, ostiralarekin. Horretarako, whatsapp bidez idatzi behar da 665 710 091 telefonora, adieraziz zenbat joango diren. Aurreneko 50ak apuntatutakoan itxiko dute zerrenda.
Aurreko urteetan, Felix Ugarte Elkarteak berak antolatu izan ditu bisita gidatuak, Iturmendiko jentilzuloan. 2013an hasita, ia urtero eman die aukera herritarrei, jentilzuloa barrutik ezagutzeko; eta arrakasta haundia izan dute beti, herritar asko erakarrita. 2019an egin zuten azkeneko aldiz, eta 80 herritar baino gehiago gerturatu ziren.