Urtero bezala, Biteri kultur etxeak ikastaroen eskaintza zabala ekarriko du ikasturtearen hasierarekin batera. 36 ikastaro eskainiko dira, 29 helduentzat eta zazpi haur eta gazteentzat.
Askotariko ikastaroak egongo dira aukeran. Sormena lantzeko helburua dutenak, hala nola, pintura, marrazketa, egur taila, zeramika, altzarien zaharberritzea eta eskulanak. Gorputz espresioari lotutakoak ere izango dira ikasturte honetan: yoga, antzerkia, dantza garaikidea, dantza latinoak, hip hop eta tai chi kung. Eta bestelakoak: sukaldaritza, patchwork, joskintza eta patroigintza eta argazkilaritza.
Covid-19 dela eta, 2-3 eta 4-5 urteko haurrei eskainitako «Sormena, emozioa eta giza trebetasunak lantzeko tailerrak» bertan behera geratu zirenak aurten berreskuratu egin dira. Egoeraren bilakaeraren arabera baliteke adin tarte horri zuzendutako eskaintza aurrerago egitea.
Plazak baino izenemate gehiago badago zozketa
Ikastaroetan parte hartu nahi izatekotan, aldez aurretik izena eman behar da. Horretarako parada egongo da irailaren 8tik 17ra bitartean. Kultur etxean bertan eta, aurten, lehen aldiz, interneten bidez, web.hernani.eus/kultura edo www.hernani.eus helbideetan.
Presentzialki, Biteri kultur etxean, 09:00etatik 13:00etara eta 16:00etatik 20:00etara egin behar da.
Izen emate kopuruak ikastaroaren plaza kopurua gainditzen badu, zozketa egingo da. Zozketa irailaren 21ean egingo da eguerdiko 12:00etan Biterin.
Ikasturtearen hasiera urriaren 1ean izango da. COVID-19a dela eta, segurtasun neurri bereziak mantenduko dira ikastaro guztietan. Gerta liteke ikastaroan zehar egokitzapenak egin behar izatea, egoerak horrela eskatuta. Gabonetan eta Aste Santuan oporrak egongo dira, baita haurrek ere inauterien egunetan.