Aurten Bertsolari aldizkariak 30. urteurrena betetzen duela eta, data hori baliatu dute bertso paper lehiaketa antolatzeko. Guztira, 16 lan aurkeztu dira helduen mailan eta Iñigo Legorburu hernaniarra gailendu da Bularretik mintzo sortarekin. Bertso sarituak, irakurgai daude Bertsolari aldizkariaren udako alean.
Lehiaketako baldintzen artean, bertso sortak 3 bertsoz osatuta behar zuen gehienez; eta gaia eta doinua libreak ziren. Legorburuk dio ohituta dagoela zortzi edo bertso gehiagoko formatuetan aritzera; «baina argi neukan, kasu honetan, bertso txapelketako kartzelako gaiaren antzeko zerbait egin behar nuela, hiru bertsorekin, emozioak azken unera arte mantenduta». Horretarako, ama eta alaba nerabe baten harremanean oinarritu du lana Legorburuk, eta honakoa azaldu du: «irakurleak, trama jarraitzeko arazorik ez du izango, baina azken bertsoko erdira arte ez du guztiz ulertzen nondik norakoa».
Horrez gain, minbiziaren presentzia gailentzen da, «beti ere esperientziari lotuta», dio hernaniarrak. Bi pertsonaiek bizi duten egoera gogorra eta aldrebesa den arren, Legorbururen ustez «egunerokoa ari da bilakatzen zoritxarrez, batez ere adin batetik gora».
Doinua ere, berezia aukeratu du idazleak: Xabier Leteren Amaren bularra, hain justu. Beste hainbatetan ere erabili izan du, eta oso emaitza onak lortu ditu. Egilearen hitzetan, «doinu iradokitzailea eta intimista da, berez sehaska kanta dena. Goxoa eta narratibarentzat ongi zetorkidana, nahiz eta neurri txikiko 7-6 formatu horrek eta 8 errimaz osatu beharreko bertsoak mugitzen ninduen», azaldu du.
«Oso pozik eta harro» dago Legorburu, azken lehiaketa honetan lortutako emaitzarekin. Izan ere, Bertsolari aldizkarikoek «zabalkundea izango duela agindu digute sarituei: batetik, Oskar Estanga nafar bertsolariak musikatu egingo ditu, gero sare sozialetan eta interneten zabaltzeko, podcast eta YouTubeko kanalen bidez. Eta, bestetik, bertsoaren inguruko portaletan irakurgai egongo direla ere uste dut».
Legorburuk garrantzia ematen dio bertso idatzien zabalkundeari eta honakoa azaldu du; «oraingoz ez gara asmatzen ari. Nire iritziz, bertsoa gaur egungo komunikazio moduetara bikain egokitzen da, azkarra eta barneratzen nahiko erraza da. Gainera, haietako askok gai sozialak eta denoi eragiten dizkigutenak ikutzen dituzte eta horrek, oso hurbilekoak bihurtzen ditu».
Epaile modura, Ekaitz Goikoetxea, Eli Pagola eta Mikel Mendizabal jardun dira. Legorburuk, irabazle gisa, Getariako Kabian apartamentuetan gau bateko estantzia irabazi du, bi laguntzentzat. Elkano Scaperoomerako bi sarrera ere lortu ditu eta horrez gain, Ternuaren kamiseta bat.
'Bularretik mintzo'. Doinua: 'Amaren bularra' (Xabier Lete)
Hitzartuta bezala,
ilunabarrean
aspaldiko promesa
baten aparrean
hasi da abentura…
diot marmarrean
nerabea zarela
ahaztu xamarrean.
Estrainekoz, eskutik
estilo zaharrean
nerbioek barrutik
gu jan beharrean…
Normaltasun eria
denez indarrean
zenbat lehenengo aldi,
aldi bakarrean!
Eritasuna gaixo
jarri bitartean
konplize izatera
garamatzate han.
Ileapaindegiko
eskaparatean
diozu ezin gara
gelditu atean!
Ziurtasunez niri
hori esatean
esperantza piztu da
nire aldartean…
Harrotasunez bete
nauzu bat-batean
zu zarenaren zati
biok izatean.
Emozioz dardarka
daukazu kokotza
baina ausarki moztu
dizute mototsa:
Ama, bizi duzuna
gaur ez zait arrotza,
zure ile-ordea
jada ez da motza!
Kimio, goragale
ta beldur bakoitza
urrun nabari ditut,
urrun heriotza!
Hil ordez, ile-orde…
ta akabo lotsa!
Bularraren ordezko
dut zure bihotza.