Udako programazioaren barruan, larunbat honetan Gazte kale ikuskizuna izango da Atsegindegin, 20:00etan. Oinkari Dantza Taldeak eta Hika Teatroak sortu dute emanaldia, elkarlanean, eta Hernanin aurkeztuko dute asteburuan. Gonbidapenak aldez aurretik eskuratu behar dira, Biterin. Antolatzaileek adierazi dute pertsona bakoitzak, gehienez ere, 4 sarrera har ditzakeela.
Bi taldeak elkarrekin lanean aritzen diren lehenengo aldia ez dela kontatu dio Agurtzane Intxaurragak, emanaldiko zuzendariak, Kronikari. Horrekin batera, larunbatekoa «berezia» izango dela aitortu du. Izan ere, orain arte lanean aritu ez diren modu batean sortu dute ikuskizuna; eta, lehen aldiz, dantza, antzerkia eta bestelako diziplinak uztartu dituzte.
Gainera, «haurrei, gazteei zein helduei» zuzendutako emanaldia dela aurreratu du Intxaurragak; eta, beraz, herritar guztiei luzatu diete deialdia, Atsegindegira bertaratzeko.
Bestalde, hernaniarrei ezaguna izango zaie Oinkariko dantzarietako bat. Hain justu, Aimar Garaiar hernaniarra izango da oholtza gainean. Bere herrian dantzatzeko «gogotsu» dagoela aitortu du Garaiarrek, eta ziurtatu du bertaratzen diren guztiek ikuskizunarekin gozatuko dutela.
Gazteak eta gaztetasuna, erdigunean
Ikuskizunaren izenburuak deskribatzen duen bezalaxe, emanaldiak «gazteak eta gaztetasuna» izango ditu hizpide, eta dantzaren eta antzerkiaren bidez, ahotsa emango die haien kezkei eta ezinegonei .